ضيف علينا حل يا مرحبا به
ترحيبة تجلى عن القلب الأحزان
ضيف نهليبه ونحسب حسابه
له بالقلوب البيض قدر وعنوان
شهر رمضان الله ذكر في كتابه
فيه أنزل القرآن والنور به بان
أوله رحمة كل مسلم درابه
ووسطه من رب السموات غفران
وآخره عتق من لهيب وعذابه
طالبك عفوك يوم روغات الأذهان
يوم السؤال ويوم وقت الإجابه
افتح لنا من يمة الخير بيبان
هذا وبلغنا رمضان وثوابه
يا لله يالمعبود يا عالي الشان
اقبل دعانا والخبر يقتدابه
الصوم به عدة فوايد للإنسان
يا مسلمين الخير مفتوح بابه
صوموا تصحوا وأكملوا خمس الأركان
هذي نصيحة خير عز ومهابه
والمسلمين اخوان وأقول يا اخوان
الآدمي حذرا يضيع شبابه
ترى شباب الآدمي ماله أثمان
وانبه الغافل لا ينسى زهابه
من قدم الحسنى يجازى بالإحسان
وقراءة القرآن خير ورحابه
مع طاعة المعبود في كل الأزمان
ومجاهدة الأنفس يبي له صلابه
ماهيب فترة تنهي كل الأزمان
والموت له يوم ينوخ ركابه
والخاتمة من قلب وشعور ولسان
صلوا عدد ما لاح برق السحابه
على النبي الهاشمي نسل عدنان