الرئيسية > خزامى الصحارى
حر مقامه فوق كل المقامات
للموقف اسبابه وللشعر حزات
وللمجد تاريخ يدون سطوره
وللطيب سادات وللعز هامات
وللجود رايه شامخه ومخبوره
وللمد يمنا غيثها دوم زخات
مداتها فوق الصخور محفوره
وللحمل متن يرتكي للثقيلات
وللمواقف الساطي قلوب جسوره
والخير في وجه التقي له علامات
لو ان عينك تلمحه وسط صوره
قلته ودوك اثبات يامدور اثبات
(سلطان بن عبدالعزيز اخو نوره)
هاك الحجاج اللي له الطيب عادات
وهاك المحيا اللي يقديك نوره
ولي عهد الدار راعي السياسات
وزير قوتنا ويا قو دوره
ودي بمدحة سيدي بس الابيات
قدام طيبه صاغره ومحقوره
لنه بطيبه فاق كل المساحات
اسطورته ما هيب آية اسطوره
عشنا حقيقتها وشفنا دلالات
كم من غريم فك سلطان جوره
يا ضايق من هم للهم ويلات
أخذ الكلام ودوك نعم المشوره
ازبن على قصر مثل ضلع ابانات
قصر الكريم اللي يذريك سوره
سلطان لا ظامك من الوقت صكات
تلقاه مثل طويق تذري صخوره
ستر الهنوف اللي تقود الخوندات
اللي على مذهب أهلها غيوره
وزبن الكريم اللي من الهم مابات
اللي عليه الدين ترزم دهوره
وريف اليتيم اللي حياته متاهات
ومن قلة الحيله يديه مهجوره
كريم سبلا باليال الشديدات
ويديه عن مد القليل محظوره
ذخر البلاد ودرعها بالمهمات
عوق الخصيم اللي طغابه غروره
اسم على طاريه تعتز رايات
نادر حرار شامخات وكوره
حر مقامه فوق كل المقامات
وعن شبر غيره فارقات شبوره
ياسيدي يكفيك عن كل مافات
مجد على مر الزمان وعصوره
ابوك وان عدوا كبار الزعامات
تاريخه السامي يعزز حظوره
من تعرفه شلفا وسيف وبطولات
يكفيك فخر وكل شعبك فخوره
انتم هل العوجا ملوك وسادات
آل سعود مهجدة كل ثوره
ومن رز نفسه شايف فيه هقوات
نلعب براسه لعب ورع بكوره
ونقرا عليه الفاتحة والتحيات
وعن دارنا بالسيف نقلع جذوره
ونقول له ياتايه الدرب هيهات
الحكم للّه ثم لخوان نوره