لا نمت ليل ولا نهار اهنيبه

قضيت وقتي بين هم وتكدير

وبين الجروح اللي في قلبي عطيبه

وأن قلت بمشي جا بدربي معاثير

دربي ظلام وصعب ما ينمشي به

وان جاني الدكتور يأخذ تقارير

ما يكشف اللي بداخلي مبتليبه

لو كسرت عيني من الدمع تكسير

والقلب يشكي كل هم يصيبه

ما ظن احصل من يجي دون تأخير

حتى يخفف من ثقيل المصيبة

دام الذي حبه يفوق التعابير

صارت علومه غير الأول غريبة

تشاقه عيون لأجله مساهير

وما شفت أنا بالزين شوق يجيبه

الله أكبر من خفايا المقادير

ورتني أحوال الزمان العجيبة

وأصبح حبيبك فيك يحتاج تذكير

من شان يذكر في خياله حبيبه

يا عونة الله يوم مالي مذاخير

واللي ظلمني جعل ربي حسيبه