اقطع لنا عذق من النخل يافلان
عندي التمر غالي وغاية مرادي
وخصوص لاصار النخل وسط بستان
بأرض الوطن منتوجها من بلادي
خير الوطن ضافي على كل الأوطان
الكل يشهد له قريب وبعادي
سعود بن سعد الحافي - الرياض
ياكر ساعفني أطول المناصيف
زان الخراف اللي له النفس شفقه
صحن القدوع مجاورن دلة الكيف
يغني عن جلال الدراهم ودقه
ومن حبه الله أكرم الجار والضيف
ولابد من غيث إذا لاح برقه
سليمان محمد الرفيق - الرياض
ياناس هذي حالته من بدأ النور
يرقا وينشب كل يوم بعله
يامسلم أنزل كل يوم بك كسور
أتعبتنا خل النخل عنك خله
تقول حطولي نخل داخل السور
قمنا وجبنا لك غرايس مظله
أبيك ما ترقا النخل.. تلزم الشور
ولاتراني بقشعه من محله
عبدالله ونيس الشمري - الرياض
هذا النخل رمز الكرم والشهامة
من حبنا له نغرسه داخل الدور
وصى عليه المصطفى في كلامه
وفي محكم التنزيل في الآي مذكور
جني التمر محبوب أهوى صرامه
وأحب رطب ناقر فيه عصفور
ناصر بن جمعان آل عوض - وادي الدواسر
لاتقطع النخله إلا عند وقت الصرام
ياللي بفاسك قطعت أفروعها والعذوق
والحبل لو ينقطع بيروح جسمك عدام
ياشايب أفهم ما باقي إلا العصب والعروق
لاتحسب إنك نشيط وطيب كل عام
الكبر ينزلك غصب له تعليت فوق
سعيد بن علي آل برمان الحبابي - الرياض
نفسك ترى له حق لاشك معذور
بتركيب تلقيح النخل والجدادي
ياشيخ وقت فات ماجيت بقصور
تزرع وتحصد حرها والبرادي
اللي طويله خلها منت مجبور
والكر حذرا لايجيك بنكادي
فهد بن عقيل الطويان - بريدة
ذي عادة الأجداد محدن يخليه
ذكرى رجال والسعد يوم ذكراه
ذي نخلة عز وفخر من يواليه
ويجدد أزمان على القلب طرياه
هذي نخلتنا وفضلها الكل يجنيه
مثل أمنا ياطيبها في عطاياه
محمد بن عبدالعزيز الخنيفر - أشيقر
البطان شده وانتبه من الخصابه
ترى جذوع الباسقات مخطوره
كم واحدن قبلك حصله إصابة
مفترقي الماضي وخبرة عصوره
ترى حلاة الغرس لكمل انصابه
يزكيه للي منزل كل صوره
سعود الهزاع - نعام
النخل رمزاً للعطا والكرامه
فيه الفوائد ياجماعه كثيره
في نجد يوجد لين وسط المنامه
الشجره اللي زينة كل ديره
صارت لمعنى العز أكبر علامه
في نجد وأيضا كل شبه الجزيره
هاني بن محمد السلوم - شقراء
* نستقبل مشاركاتكم الشعرية حتى مساء الاثنين إلى الفاكس رقم 4871070 زاوية (صوت الصورة).. ويامرحباً بالجميع.
التعليق مقفل لإنتهاء الفتره المحدده له
