للشاعر صقر النصافي قصيدة يوصي فيها أبناءه بالتحلي ببعض الصفات الحميدة وعوائد الرجال ويرشدهم إلى طريق الصواب من واقع تجربته في الحياة واستفادته من تجارب الآخرين وهي عادة ينتهجها الشعراء في حث أبنائهم بقصائد يوصونهم من خلالها على التحلي بكل عادة طيبة والابتعاد عن كل عادة ذميمة.
وقد طرق الشاعر إلى أكثر من خصلة تهم يحرص كل رجل أن تكون أحد خصاله ويفتخر بها.
يقول في قصيدة طويلة نقتطف منها:
قال: من وصى عياله وده إلهم بالشكاله
خابر (ن) راعي الرزاله بالمجالس تشنعه
يا «إمهلي» شوف اخوانك شانهم من صوب شانك
عندما يزعل إلسانك عنهم الغيظ أدفعه
وأنت يا «علي» افتكر خل قولي لك ذكر
ربعة الطيب شكر والردي لا تتبعه
يا «مسلم» وأنا أبوك العرب لو صاحبوكم
ايسرك غير أخوك كل ما يأمر طعه
يا عيالي كلكم أفطنوا في حالكم
التنازع ذلكم والتصافي منفعه
أجهدوا لله بطاعه وأتبعوا راعي الشفاعه
قبل يوم فيه ساعة عند ربي مرجعه
القصير أمشوا بحقه لو بدت منه المشقه
وإن كثر بالقلب دقه طو بيتك وأشلعه
مادواه إلامراحه في فراق السوء راحه
لا نجازيه بقباحه يوم ربه صرقعه
والخوي حقه عليكم تجعلونه من حديكم
كل شغله في يديكم لين ياصل مربعه
إن تمرجل كيفو به وإن تردا عبرو به
لو يصير لكم عقوبه قصة (ن) بالمبلعه
والحمق يخر مضره يلحق العقيل شره
ون طرا راعيه مره قالوا الله يقطعه
والصبر عند البلاوي خير من كثر الشكاوي
لو تصيح ولو تلاوي مابغا الله يصنعه
وأحذروا حقر الفقير دعوته يمكن تصير؟
أدخل الله واستجير قبل يذرف مدمعه
التكبر للرخوم يحسبون إهم القروم
عندما يبدى اللزوم عشرهم نصف أربعه
والعدو لو زان باله أنقلوا منه الحماله
لو مغط ألكم حباله بغضكم يبقى معه
والصديق بكل حال عند حضرات المجال
مدحكم عند الرجال كل ما جاه أشبعه
والصديق إليا نكركم ما دواه إلا ظهركم
وإن خضعتوله حقركم صرتوا عنده مضفعه
والتمني ما يفيد لو تزيده ما يزيد
مثل بق طار من إيد بالهوى من يجمعه
والحلوف أبغير حاجة كلها ذنب وسماجة
واجد اللي باللجاجة دوم حلفه يمطعه
كم صبي (ن) بالرخا ظنكم فيه الصخا
وأن كربتوه أرتخا كل عذر (ن) باسمه
جاز من كل الصداقة والمحبة واللباقة
والسبب نفسه أرفاقه حتى الانه تضلعه
والمغفل يحسبنه دوم في نعمة وجنة
ماخذ (ن) دنياه ظنه لين بقعا تصقعه
ثم يقعد من منامه ملحق (ن) نفسه ملامه
عقب ما شاف الندامه يوم هاك الكعكعه
الرجال أبهم فهيم لا يضام ولا يضيم
عندما يبدى حليم والحقوق مشرعة
راعي الصبر محمود لين مولمته تعود
ثم ينزل بالحدود والمطمن يرفعه
والرجال إبهم ثقيل كل عمره ما يعيل
وإن طمع فيه الجبيل دون حقه يصفعه
أن بغيته بالمروه شفت نو الخير نوه
وأن بغيت الحق قوة طز عينك بأصبعه
وإن بلاك الله بعاقه من مقاريد الرفاقه
لا توريه الحماقة لين ربك يقلعه
خل شوفاتك بعيدة عند نفخاته وريدة
ثم عقب (ن) لا نعيده السعه ثم السعه
كم صبي (ن) كل يوم يعتزي من غير قوم
وإن تناطحت القروم ما يداني الفرقعه..!!
صاير (ن) للشر سبه لين يلقا من يدبه
ثم يبرك للمسبه يوم جاه من أشبعه
والسفيه إليا نهيته عن طريق (ن) ما بغيته
لو تجره ما قويته والندى ما يسمعه
التعليق مقفل لإنتهاء الفتره المحدده له
