تمثل الشاعر وله فن وفنون
قاف على معنى كما الذوب حالي
قاف على معنى ومقفي وموزون
لا به خطا معنى ولا به ميالي
قلبي يحب الشعر بالشعر مفتون
ولا للحمول الا ظهور الجمالي
وجدي على شعر مجمل ومصيون
لابه مدوح زود كله جزالي
وجد يحالي صدق بالشكل واللون
وجد كما وجد البدو للخيالي
نشى وخيل فيه ربان ومزون
مزن الخريف اللي هبوبه شمالي
ونهار غب السيل راحوا يعسون
وتباشرو به في جميع الحوالي
ويومين غب السيل دنوا يشدون
وقالوا وعدنا يم ذيك العبالي
وفي وسط ذيك العبلة امسو يبنون
بعد الرحيل وبعد شد الرحالي
في علبةٍ فيها نواوير وفنون
والقرنوه فيها سوات الحبالي
والبل تراقع فيه والجو مزيون
وفيها النصي غطى ظهور التلاكي
اللي على بير الضوامي يحدون
والآخرين يرددون الحلالي
وتجمعوا في مجلس العز والصون
في مجلس تزهاه حمر الزوالي
اللي على المقهاه واللي يتقهوون
برية في وسط صفر الدلالي
وكبار سن في المجالس يسلون
وهذا الجواب اللي يحل السوالي
وهذي طراة العمر ياللي تعرفون
والعمر فاني لو تطول الليالي
لونها تبقى بقة حظ فرعون
لكنها معروفة بالزوالي
وياللي تطاردها نقول الك بالهون
البدر يكبر ثم يعود هلالي