الرئيسية > خزامى الصحارى
صوت الصورة
مستأمن ونايم فراش ولحاف
ذاك الولد عقب اللعب والسباحه
مستلقي وللكيمره بان وانشاف
وسط البراد اللي يداوي جراحه
يستأهل أنظم له من الشعر والقاف
وخصوص لا حاز بتفوق نجاحه
سعود بن سعد الحافي/ الرياض
أشهد انك يا طفل بعدك بري
ما تفرق بين لستك أو سرير
صابك نعاس بعد ركض وجري
ورحت في نوم عميق يا صغير
الطفل جاهل وله عظم طري
تركه بروحه ترى أمراً خطير
ناصر بن جمعان آل عوض
وادي الدواسر
خذ راحتك نومك ولاقول غرقان
في مسبح ياما غرق فيه قبلك
رقدت باللستك مزلغم وزعلان
ما فيه غير اللعب بحدود عقلك
كم غافل عاش المآسي والأحزان
إلى غفل عن الصغيرين مثلك
فهد بن عقيل الطويان
بريدة
هيضتني يا ورع.. هاضت علومي
وأشتقت للساحل واللي سكن فيه
نومك عميق وتحلم أنك تعومي
ولانته بحول البحر ولانته حواليه
نفيختك شلها وحذرا تنومي
وليا وصلت البحر تحتاجها فيه
تركي بن سند الهملان
الرياض
نام الطفل بعد التعب واهنيه
ماتشغله أسهم ولاهمّه الدين
همّه إلى من قام يلقى خويه
يلعب معه ويجيب باقي الوراعين
أكبر حلم عنده تجي له هديه
سيكل جديد وسابقن فالميادين
سحر سعد العبيد
يا أم الولد تطمني لا تخافين
كان أنتي دورتيه ولا لقيتيه
ما هو غرقان بمسبح تظنين
غرقان في نومه عسى الله يعافيه
اللستك اللي للسباحه تريدين
حطه فراش وسادته منه وفيه
عبدالعزيز علي الصالح حائل
الطفل في لستكه يازين هالنومه
عقب السباحه يقول الجو يهنالي
جاه الجبر صوَّره والطفل بحلومه
في لقطة حلوه للصغيرَّ الغالي
والى انتهض من منامه قرَّب القومه
عنه المسابح وغيره حطوا أقفالي
محمد بن عبدالعزيز الخنيفر/ أشيقر
الطفل وسط الكفر نايم
يمكن هل الطفل ناسينه
خلوه وسط البحر عايم
يفرك على الخد بيدنيه
معذور وأن لامهم لايم
يا قالوا الطفل مغدينه
زبن مقبل العنزي/ بريدة
الصوره اللي تدمي القلب با جراح
صوره تخلي القلب ياناس ذايب
نوم اللساتك ما خبرناه ياصاح
بأسبابها ظهرك مقوّس وعايب
خالد بن ناصر المخيمر/ روضة سدير
الطفل نايم فوق لستك ومبسوط
بارض خلا ما حوله اللي يساله
من التعب كنه من السطح مقروط
يا ناس منهو يعرف اللي جراله
نايم على اللستك وبالحيل مربوط
حاله كسيفه والبحر ما صفا له
عقلا خزن العنزي/ تبوك
نايم بلستك كنه بغرفة النوم
والقلب خالي من كثير الهمومي
توه صغير ولاهوب مليوم
وخوفي يجيه مضيع الدرب هومي
يالله ياناصر عبيده على الروم
من الخطر تحميه وحر السمومي
حمد عبدالله الوايلي
حوطة سدير
٭٭ نستقبل المشاركات حتى مساء الاثنين على الفاكس رقم 4871070 زاوية (صوت الصورة) ونأمل الكتابة بخط واضح.. وأهلاً بالجميع.