الأسبوع الماضي كان لغز الاسبوع من طرح الشاعر مشرع ذعار العوهلي والذي يقول:
ويش رجل عند خلق الله له حشمة وقيمه
يحكم العربان وتطيعه واذا عيت غصبها
في حياته كلبوها ما بعد ذاق الهزيمه
لو تطول المعركة يفوز والناس يغلبها
وقد توصل للحل شعراً كل من:
راكب اللي وان مشى بالخط ما يأخذ قسيمه
رابط حزام الامان وعدته كمل طلبها
حمل لمشرع سلامي وعسى ربي يديمه
حل لغزه «نوم عيني» يوم جاطبق هدبها
علي غنام الغنام - رياض الخبراء
من يحب النوم يالاجواد ما جاب الغنيمه
المثل مشهور يالاجواد في جملة عربها
والسهر للعين يالاجواد يجعلها وريمه
تورم عيونك ويتعبها ولا تعرف سببها
حميد بن خلف الملفي العنزي
مرحبا يالعوهلي والسلام الله يديمه
بيننا عبر الخزامى تحفة والله بدبها
ياصلك بالوقت حل مننا قدر وشيمه
وعادة عيون السهارى نومها يحمل قصبها
شراع بن عبدالله الشمري - حائل
مرحبا حييت يا مشرع تواصيفك حكيمه
مرحبا ترحيب دله وقادع بأحلى رطبها
لغزكم النوم حله قالها راعي رحيمه
والسهر قد قيل ما فاد العيون إلا عطبها
صلاح بن عبدالله اليابس - رحيمه
مرحبا يالشاعر اللي ما جهل بدع الوسيمه
ما يجي بالطيبة ياكود رجال كسبها
من حكم بالعدل يعطى نعمة الامن العظيمه
تهتني بالنوم عين وخوفها دونه حربها
سالم البشري - الجبيل
لغز مشرع شاق لي فيه العبارات السليمه
مرحبا باللغز وابيات الفهيم اللي كتبها
حله النوم اسمعوا ياهل التفاكير الفهيمه
بالخزامى سجلوا حله مع الناس وطلبها
محمد بن ناصر العريني - رياض الخبراء
شاقني غطو البيوت الي معانيها جسيمه
حي شاعرها وحي اللي على الصفحة كتبها
وحل لغزك ظني انه النوم جعل الله يديمه
يا عوين اللي عيونه لذة النوم ايحربها
فهيد سعد الدوسري
يا سلامي للخزامى عد مزن هل ديمه
يسقي العشب الجديد ابوابل يروي قصبها
اللغز حله يجيكم مثل برق وسط غيمه
(نومنا) نعمة عظيمة دوك حل اللي كتبها
فالح بن غازي الحربي - رياض الخبراء
الأمن يالعوهلي ربي على عباده يديمه
ترقد العربان مرتاحة ليا جاها تعبها
جاك حل اللغز فالاول وفي تال الوسيمه
وقالو ان النوم ساس للوم لو تدري عربها
سلطان محمد أبو قيان - الدوادمي
يا سلام الله عليكم يالرجال أهل العزيمه
نلتقيكم بالخزامى كل جمعة ونتزود من أدبها
حل لغزك ما يرده لو حضر قوة عظيمه
ذاك نوم والعيون اليا حضر وقته سحبها
علي رشيد الرشيد - رياض الخبراء
كما توصل للحل نثراً كل من:
حمد عبدالله الوايلي - حوطة سدير، نواف عبدالله النماصي - الاضارع، مطلق عايض القحطاني - الخرج، علي حامد الزهراني - الخرج، وئام عبدالوهاب - القطيف.
لغز الاسبوع
كتبه لصفحة خزامى الصحاري الشاعر فهيد سعد الدوسري من السليل ويقول:
ويش رجال ايلا من حل في دار قلبها
لا نزل فيها بلون حطها في لون ثاني
سمعته معروفة وان حاربه قوماً غلبها
لازماً التالية له كل ما طال الزماني
نستقبل الحلول على فاكس 4871070 خزامى الصحاري - لغز الاسبوع - كما نرحب بطرح الالغاز الجيدة والجديدة.