الرئيسية > خزامى الصحارى
صوت الصورة
مجلس تراث ومجد الاجداد حاوية
يسلم له اللي حافظه واعتنابه
نار وكمر وادلال بجذوع طامية
بأثل وجريد الغيد كل قشابه
وعن حرها والبرد بالطين بانيه
للضيف به والجار قدر او رحابه
فهد بن عقيل الطويان - بريدة
ياحب بعض الناس للضو والكيف
جلسة مع الفنجال فيهم طبيعة
اللي ترحب لا لفا عندهم ضيف
وسوالف منها الخواطر وسيعه
في مجلس ماهو بمجلس ملاقيف
مجلس على ذوق العقول الرفيعة
ظافر بن مهدي القشانين
جلسة صفا لأهل النفوس المريحة
في وسط دويان مطرز ومنقوش
وفنجال من بن اليمن فاح ريحه
يستاهله رجل عن الطيب ما يحوش
وسوالف مع النشاما مليحة
اخير من بعض الاستراحات ودشوش
عبدالعزيز محمد ابو رشيد - نعام
وجدي على جلسة نشاما تقهوى
في مجلس شاقني فرشة ومركاه
ويازين سراج بالغما تعلوى
الله ياقا صاحبه ويرعاه
نايف ابراهيم زيد الشثرى - حوطة بني تميم
الصورة اللي لها عند العرب قيمة
وكل مجلس سعودي من اللي فيها ما خلا
حنا هل الطيب وحنا هل الشيمة
ومن لفا لديارنا يبشر له بقوله هلا
ما نسينا كرم اهلنا ولا فنه وتعليمه
السعودي بالكرم واضح على روس الملا
خالد بن ناصر المحيمر - روضة سدير
ناس لهم بالقلب حشمة وتقدير
ودك تسير يمهم كل يومي
ياماحلا شوف الدلال المباهير
في مجلس يبعد كثير الهمومي
فنجالها يسوى فلوس ودنانير
مع رجال كلبوهم قرومي
عبدالله بن عبود السهلي - تبوك
المجلس اللي به معاميل ووجار
مجلس قديم الحال والكهرب سراج
الضيف محتار يبي شبة النار
وبن ومحماس معه فلة حجاج
ويسج دولاجه على بعض الاخبار
ومعزبه سالي وعن واجبة ساج
سعود بن سعد الحافي - الرياض
منى لأهل صفحة خزامى سلاما
عد المطر لنشت سحايب اقنوفه
المجلس اللي به تراث النشاما
يفز قلبي له ويطرب لشوفة
سعيد بن علي آل برمان
ياحي عين اللي يسوق الفناجيل
بالكيف يسع خاطر الضيف لاجاه
وبالزعفران تحاف مع صافي الهيل
وتساق للي منبع الطيب مجناه
ومعزب يفرح بشوف المشاكيل
لامن بغيته حزة الطيب تلقاه
نايف محمد مناحي القحطاني
ياما حلى يابكر شوف الرجاجيل
في مجلس مافيه نفس رديه
يدور فيه مبهرات من الهيل
فنجالها ينعش هل الشاذلية
فنجالها يسوي جميع الفناجيل
اشهد شهادة حق ما فيه زيه
سلطان بن حمد الحبابي - الطائف
ياللي تجيب الحطب والنار موقدها
والباب مفتوح والد له مسويها
هذه سلوم الجدود اللي نعددها
وحافظ على سلوم جدانك وداريها
تكرم الضيف وهذي من عوايدها
والجار يلقي الكرامة في مزاريها
عقلا خزن العنزي - تبوك
وين الكمار اللي يضم المعاميل
وين الوجار اللي به دلال مركات
وين التمر والقرص.. باقي الفناجيل
وباقي الدلال اللي على كمار صفات
شفت النجر.. ماشفت مهباشة الهيل
ومركى مع بريقين ودله وسرجات
هيا سعد العبيد
القلب قبل الدار مفتوح للضيف
من زارني اهلا وسهلا وترحيب
يستاهل الفنجال من دلة الكيف
الحيل تذبح له ويقدم الطيب
نسلي الخاطر بشعر وسواليف
ما نطري الشينة ولا نطري العيب
ناصر بن جمعان آل عوض - وادي الدواسر
حوز المراجل واعصب الرأس يافلان
هذي طراة العمر والعمر فاني
وشب نارك وبهر دلال رسلان
وسوق فنجال من دلال رسلاني
وقلط نشامى.. قم افتح البيبان
وسوسواة ذريين الايماني
منصور معيد حمود الغيث - المزاحمية
ما حلى ايام لنا راحت ذهب
يوم كل يعمل البن بيديه
دلة صفرا ومعاميل ورطب
والرجل يفرح بلي سير عليه
مجلس شعبي مرابيعه خشب
والسراج معلق وشغل بتيه
مبارك محمد بن طرجم الدوسري
يازين جوي مع رفيقي على الكيف
مع دلة صفر أبها البن والهيل
يرتاح بالي لا لفا يمي الضيف
وترى الوفا هو سلمنا والمواصيل
في مجلس فيه القصص والسواليف
ببيات شعر كم تزين التعاليل
محمد بن عبدالعزيز الخنيفر - أشيقر
هيظتني صورة وسط الجريدة
ترسم الماضي من هذا البلد
صورة يابوفهد جداً فريدة
اعجبتني يوم نشرت في العدد
صورة الفنجال ودلال عريقة
تنسكب للضيف لا منه ورد
ناصر بن فهاد آل هلال
يازينها دلة ومركا تركاه
والمنقل الي ريحته شب سمرات
يذكرك باللي مضي كان تنساه
ايام عشنا وقتنا فيه فرحات
ومضي الزمان الي نحبه ونهواه
وجانا الزمان اللي كثير الدعايات
اسماعيل ابراهيم السلمان - الصفرات
يابكر صورة عدد يالذرب تجذبني
لاهل الوفاء والكرم واهل المعاميلي
اشتقت انا ياعرب والطيب يطربني
وقت مضى ينوجد وحتى بهالجيلي
دلة وابريق مع تاريخ يعجبني
وسوالف تنسمع وايضاً تعاليلي
خالد بن غزاي الحسيني - بريدة
بالصوت والصورة اقول المعاني
واشارك الشعار بصفحة خزامى
والله على فنجال بن يماني
بمجلس (ن) به طاب كيف النشاما
ومني على اهل الطيب قاصي وداني
ازكى سلام (ن) عد وبل الغماما
علي سلمان المشاري - الرياض
نستقبل مشاركات الاخوة الشعراء حتى مساء الاثنين من كل اسبوع الى الفاكس رقم ,4871070. زاوية (صوت الصورة) وأهلاً بالجميع.