اقبل العيد يخفي فرحتي في خباه
فرحة تختلف عن فرحة العالمين
ما عرفها يكون اللي ملكني هواه
يوم اشوفه احس ان فرحتي فرحتين
عارف مقصدي من قبل لفظ الشفاه
وأنا داري بقصده قبل ماهو يبين
ان تكلم بكلمة طيرتني بسماه
وإن تبسم يذكرني بماضي السنين
يوم كنا صغار السن نمشي حفاه
والنوايا سليمة ما حصل يوم شين
ذاك والله حبه خاطري ما نساه
كم تمنيت اشوفه مبتسم كل حين
وأتمنى وجوده وأتحرى نباه
وأن تأخر اعد الثانية ساعتين
وان تعذر وصوله قلت يسعد مساه
اسعد الله مساه وجملة السامعين