المجلس اللي فيه واشي وبلاس
أبعد عنه مالك بخيره وشره
تجنبه ما دام وكراً للانجاس
وش عاد لو انه قريب مقره
النذل ماله مع هل الطيب مجلاس
وماله من التقدير مثقال ذره
متقلباً يمشي على كل الاجناس
ومشاكل العالم تزيد مسره
يركض بعلما شين معدوم الاحساس
ولن كان علماً زين بالقلب صره
ويلبيس العالم هناديم الادناس
بالكذب في عيون المخاليق ذره
لن شفت شكله قلت ذا خيرت الناس
وليا هرج لك قلت لله دره
كنه مع اهل الجود قدوه ونبراس
ينصحك واحياناً عليك يتشره
وليا كشفته قال انا اسمع من الناس
مالي ومال الوقت حلوه ومره
هذا الذي حقه بالاقدام ينداس
ويضيق فيه الكون بحره وبره
محمد مذكر المغيبي العتيبي
