يا مـل قلـب بيـن الأضـلاع لا جـاض

هـدت جبال طويق شـدة جضيضـه

الدمـع من عيني على محجـري فـاض

وادي الرمـه لا سال كنـه مفيضـه

على هنـوف ناعــم عودهـا غـاض

منبـوزة الردفيـن غضـه غضيضــه 

ادعـج غنـج لاقبل وسلهـم بالألحـاظ

المـوت بين اغضايته واتغميضـه

من سهمــه الخفاق صابته الامـراض

جرح الهوى ما هوب يبرى مريضـه

عيـن اشقـر طالع وجاله تنهـاض

في كف صقاره تزايد نهيضـه

شاف الحباري بالفلا له تنفـاض

ادلى بمخلابه وطير نفيضـه

والخـد بـرق في دجى الليل لا نـاض

الى لمـع بالجو يجهر وميضـه

ان ما حصل سيد البني حلو الالفـاظ

نفسي عقـب فرقاه ما هي حضيضـه

كم عاشـق من لوعـة الحب مغتـاض 

باسباب هاجوس وهـم يغيضـه

لو جني الخفـرات عن زيـد ماعتـاض

والله ماخذ غير خلي عويضـه

راعي جديـل فـوق الامتـان نقـاض 

 شقـر كسا بيـض الترايب نقيضـه

والقـد بردي عليه النهر فاض

لا هب ذعذاع الهوى زاد فيضه

جيد الفريد اللي مرابيه بفيـاض

متذير وانحاز من وسط فيضـه