هذه الأبيات مجاراة لقصيدة الشاعر المعروف خالد البقمي المنشورة في صفحة خزامى الصحارى تحت عنوان "الصّبر" الخميس 5 ذي الحجة 1439هـ - 16 أغسطس 2018م.

شكواك ياخالد على ابو مناحي

لاتبري العله ولاتزيد عله

العبد لاضاقت عليه المشاحي

يشكي على اللي كل عقد يحله

هو الذي يبري عميق الجراحي

ويزيل هم اللي دعاه و زبن له

وان كان خلك دونه البعد ناحي

والدرب دونه يافتى ماتدله

ازبن على قوقل وصح له صياحي

وقل له يبين درب خلٍ لخلّه

وياجيت عنق الريم ظبي البراحي

غض النهد راع العيون المظله

قل له حفظت السد لين استباحي

والحب لو أخفيه كلٍ فطن له

وعمري معك لو راح ماقلت راحي

مدام حبك ورد عمري وفله

والصبر زين وفيه أجر ومباحي

ياصار ماهو صبر قهر ومذله

والطير مايكفخ بليا جناحي

ماطار طائر لو به الريش كله

وان كان انا قصرت منك السماحي

ياشاعرٍ كل المعاني تدله

زبن مقبل العنزي