عزي لحال الطير يا ناس عزّاه

زود العطش حدّه على قطرة الماي

من شاف حاله قال ويلاه.. ويلاه

الغيث مبطي والظما يخلف الراي

سبحان منهو صوره ثم سواه

يسجع بصوتٍ يطربك يشبه الناي

خالد ناصر المخيمر - روضة سدير

يا طابع الصوره على شكل الإبداع

فوق الجريده والبشر تبدي الرأي

فنان يا مصور من الوقت في ساع

والطير ظامي ينتظر شربة الماي

قطره ورى قطره لها شف وإشباع

ياللي تحب الخير شف اجرها جاي

يا طير بل الريق عاجل بالإسراع

وان صادك الصياد ما ينفع جداي

حمد عبدالله الوايلي - حوطة سدير

مبنى اظنه حط با طراف ديره

وعصفور برً يلقف الماي ظميان

حدّه عطش والقيض حامي هجيره

يستن قاطورً يجي فيض خزان

لولا الظروف القاهره والعسيره

ما جاء استراحه لو هو للولف ولهان

اسقوا طيورً من العطش مستذيره

واطعم طعام تفوز بأجرً مع احسان

يا رب غثنا بالسيول الغزيره

تملى السدود ويمتلي جوف قلبان

سعود عبدالعزيز الهزاع - نعام

الرزق مضمون للانسان والطير

وأيضاً جميع الخلق من وال الأقدار

الطير ظميان ويرويه تقطير

ربي يسوق الرزق ويقدر الخير

اللي زرع زرع والا حفر بير

قصده حياة النفس ما مقصده غير

علي الرشيد - رياض الخبراء

يا ناس شوفوا الطير بالحيل عطشان

يشرب من التقطير لا تتركوها

همّوا لها تكفون يا رجال الاحسان

حطوا لها ما عون لا تهملوها

الرحمه الرحمه وبالرجل عنوان

انتم هل الاحسان لا تغفلوها

محمد عبدالعزيز الخنيفر - أشيقر

قطرة وقطرة خيرها بعدها يبان

تروي ظما منهو على الموت مشفق

الماء حياة الحيّ حيوان وإنسان

تحيا به الاشجار وكل قلب يخفق

والماء ثروة ما تقدر بأثمان

حافظ عليها بدونها الحي ينفق

وإياك تسرف بنعمة الله ولو كان

بيتك على أنهار وأمواج تصفق

وان كنت تبغى الخير والبر وإحسان

بادر بسقيا الماء ومن خيرك أنفق

صالح علي المبارك - حوطة سدير

يا طير ذي اجواك ساير مع اجواك

ومع دورة الأفلاك مولاك يفرجها

وإن كان ما بالحوض يا طير ما اكفاك

رفرف جناحينك بواسع افججها

وياللي وضعت الميّ للطير جزواك

جنات خــلدٍ غالياتٍ درجها

سعود عائش الحربي - جدة

الطير وقع يبل الحلق

من الظما فاتحٍ فمه

القيض حدّه تسلق سلق

يبي يتروى ملي فمه

واليا تروى حلّق حلق

روح مع الجو ماهمه

خليف فهيد الحربي - الرياض

صورة العدد (عدسة / ظافر الشهري)