جلسة وناسه مع رجالٍ مطاليق

اللي يصلّح دلته شب ضوّه

ربعٍ بجال النّار ودلال وبريق

الجو بارد والمطر طاح توّه

صالح محمد محارب البشري

بالريع جلستهم على زين الاخبار

في مدخل الوادي ربـوعٍ مسافير

يا زين مجلسهم على شبّة النّار

البر له لذّة والاحوال به غير

إدلال مصفوفة بها اللبن وبهار

واللي حواليهن رجالٍ مناعير

علي الرشيد - رياض الخبراء

طبيعةٍ فيها ذرا وحسن الاطلال

هذا الذي يجلب هواة المطاليع

وياما حلى في جلسة البر فنجال

بتلى البراد وأوّلات الربيــع

ويا زين شب النّار مع صفوة البال

برفقة نشاما مع دلالٍ مهانيع

وراع الولع بالبر تلقاه في حال

تنسيه ساعاته حِساب المنافيع

مكتوب للذكرى على الصخر أقوال

للي بعد يمكن يجوها مراجيع

سعود عائش الحربي - جدة

جلسه شماليه على شقة النوّر

بين الجبال السمر من يم حايل

النّار مشبوبه على حزّت فطور

مع النشاما اللي لهم فعل هايل

البرد يصقل والجمر صار منثور

ودلال تغلي وسطها البن سايل

بأرضٍ خلا مابين ريحان وزهور

وصوت أم سالم ما تبي له بدايل

خالد ناصر المخيمر - روضة سدير

ياللي تروح البــــــر خلّـك مثالي

والناس تذكر فعلك اللي تسويّه

تثني عليك الناس لا جا مجالي

واللي معك في البر واللي تخاويّه

اترك مكانك مثل ماجيت خالي

نظيف مثل اول مرتب تساويّه

نتيجته تصعد بفعل المعـــــالي

وما يلحقك بالفعل أدنى مشاريّه

سليمان عبدالعزيز السنيدي - الرياض

جبال وطلح وسيل وافراح وسرور

في جمعة الغالين رحله سعيده

مع النشاما حلوة ولا بها كدور

يا زينها فيها العلوم المفيده

سوالف الاحباب دايم لها حضور

في طلعةٍ تعجبك باللي تريده

محمد عبدالعزيز الخنيفر - أشيقر

ياما حلا المجلاس وقت الربيعي

مجلاس ربعٍ تسعد القلب والروح

والنّار مشبوبه توقّـــــد ســريعي

ودلال هيلٍ فوق مجمار وتقوح

وتحلا لنا السمره بـ ليلٍ وديعي

وربعٍ تحب الطيب من غير مصلوح

سطام الهذال

جلسه مع الاحباب والنّار حيّه

فيها السعاده مع ربوعي والأحباب

مع النشاما جلست الشاذليّه

انا اشهد ان الجو يالربع لي طاب

فيها القصص فيها العلوم الوفيّه

وسوالفٍ تعجبك ما شابها عتاب

ريان بن محمد الخنيفر

مجلاس عز ودايمٍ يرفــــــع الراس

لا صار نقوه من ربوع الجمالات

إي والله اللي صدق نوماس نوماس

دلال كيفٍ.. والسوالف بطولات

ما فيهم اللي دايم الدوم حسّاس

رفاقةٍ للطيب بأي اتجــــــــاهات

سعد ناصر المسفر

لقطة فريـــــدة للفـريـــــدي جميله

فيها الشباب اللي يحبون الأمطار

هذي الهوايه صدق هي الأصيله

في دارنا رمز الوفا رمز الأخيار

بشائر القحطاني - الرياض

نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:

rb-khozama@alriyadh.com

ويا هلا..

صورة العدد السابق